ಅನಿಲ್ ಫೆರ್ಮಾಯ್ ಆನಿ ಎಂಸಿಸಿ ಬ್ಯಾಂಕ್... ಫುಡೆಂ ಕಿತೆಂ?

-ಜೈಸನ್ ತಾಕೊಡೆ |

ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವ್ನ್ ಎಂಸಿಸಿ ಬ್ಯಾಂಕಾಂತ್ ಅವ್ಯವಹಾರ್ ಜಾಲಾ ಮ್ಹಳ್ಳೆವಿಶಿಂ ಥಂಯ್ ಹಾಂಗಾ ಸಾಮಾಜಿಕ್ ಮಾಧ್ಯಮಾಂನಿ ವಾಚುಂಕ್ ಮೆಳ್ತಾ... ಸಬಾರಾಂಕ್ ಆಮ್ಚೆ ಸಂಸ್ಥೆ ಮ್ಹಳ್ಯಾರ್ ಸಸಾರ್... ಕಿತೆಂಯ್ ಉಲಯ್ತಾತ್... ಎಂಸಿಸಿ ಬ್ಯಾಂಕಾಚೊ ಏಕ್ ಗ್ರಾಹಕ್ ಜಾವ್ನಾಸೊನ್, ಪಾಟ್ಲ್ಯಾ ಸಬಾರ್ ವರ್ಸಾಂನಿ ಎಂಸಿಸಿ ಬ್ಯಾಂಕಾ ಸಂಗಿ ವ್ಯವಹಾರ್ ಕರುನ್ ಆಸ್ಲೆಲ್ಯಾನ್ ಹ್ಯಾ ವಿಶಿಂ ಬರಯ್ಜೆಚ್ಚ್ ಮ್ಹಣೊನ್ ಭೊಗ್ಲೆಂ.

ಥೊಡ್ಯಾ ದಶಕಾಂ ಆದಿಂ ಕುರ್ವೊನ್ ಆಸ್ಲೆಲೆಂ ಎಂಸಿಸಿ ಬ್ಯಾಂಕ್ (ಇತರ್ ಸಮುದಾಯಾಂಚ್ಯಾ ಥೊಡ್ಯಾ ಬ್ಯಾಂಕಾಂಕ್ ಸರಿ ಕೆಲ್ಯಾರ್ ಕುರ್ವೊನ್ ಆಸ್ಲೆಲೆಂ ಮ್ಹಲ್ಳೊ ಸಬ್ದ್ ವಾಪಾರ್ಲ್ಯಾರ್ ಚೂಕ್ ಜಾಂವ್ಚಿನಾ ಮ್ಹಣೊನ್ ಚಿಂತ್ತಾಂ) ಹ್ಯಾ ವರ್ಸಾಂನಿ ಚುರುಕ್ ಜಾಲಾಂ ಮ್ಹಳ್ಳ್ಯಾಂತ್ ದುಬಾವ್ ನಾ. ಹೆಂ ಸಗ್ಳೆಂ ಫೆರ್ಮಾಯ್ಚ್ಯಾ ಅನಿಲ್ ಲೋಬೊ ಎಕ್ಲ್ಯಾನ್ ಚ್ಚ್ ಕೆಲ್ಲೆಂ ಮ್ಹಣೊಂಕೀ ಹಾಂವ್ ತಯಾರ್ ನಾ. ಪುಣ್ ಏಕ್ ಬರೊ ಮುಕೆಲಿ ನಾ ತರ್ ಖಂಚೋಯಿ ಸಂಸ್ಥೊ ಮಜ್ಬೂತ್ ಜಾಂವ್ಕ್ ಸಕನಾ. ಅನಿಲಾನ್ ತೆಂ ಮುಕೆಲ್ಪಣ್ ಘೆತ್ಲಾಂ, ಆನಿ ಸಗ್ಳ್ಯಾ ಪಂಗ್ಡಾಕ್ ಸಾಂಗಾತಾ ಘೆವ್ನ್ ಮುಕಾರ್ ವೆಲಾಂ...

ಬ್ಯಾಂಕ್ ಚಲಂವ್ಚೆಂ ಮ್ಹಳ್ಯಾರ್ ತೊಂಡಾಂತ್ ಉಲಂವ್ಚ್ಯಾ ತಿತ್ಲೆಂ ಸುಲಭ್ ನಾಂ. ಪಾಟ್ಲ್ಯಾ ದಶಕಾಂನಿ ಆಡಳ್ತೆಂ ಚಲಯ್ಲೆಲ್ಯಾಂನಿ ಕೆಲ್ಲ್ಯಾ ಥೊಡ್ಯಾ ಫರಾಮೊಸಿಂಕ್ ಲಾಗೊನ್ ಎಂಸಿಸಿ ಬ್ಯಾಂಕಾಕ್ ಉಂಚಾಯೆಕ್ ಚಡೊಂಕ್ ಜಾಂವ್ಕ್ ನಾತ್ಲೆಲೆಂ. ತ್ಯಾ ನಂತರ್ ಎಂಸಿಸಿ ಬ್ಯಾಂಕ್ ಮಜ್ಬೂತ್ ಕರುಂಕ್ ಅನಿಲ್ ಫೆರ್ಮಾಯ್ ಆನಿ ಪಂಗ್ಡಾನ್ ನಿರಂತರ್ ಸಾಧನ್ ಚಲಯ್ಲಾ... ಏಕ್ ಸಂಸ್ಥೊ ಮ್ಹಣ್ತಾನಾ ತಾಂತು ಶಿಸ್ತ್ ಆಸಾಜೆಚ್ಚ್. ನಾ ತರ್ ತೊ ಸಂಸ್ಥೊ ಉದ್ದಾರ್ ಜಾಯ್ನಾ. ಅನಿಲ್ ಫೆರ್ಮಾಯ್ ಆನಿ ಟೀಮಾನ್ ಅಧಿಕಾರ್ ಘೆತಚ್ಚ್ ಖಂಯ್ ಖಂಯ್ ಉಣೆಂಪಣ್ ಆಸ್ಲೆಂ ಥಂಯ್ ಕಿತೆಂ ಕ್ರಮ್ ಘೆಜೆ ಆಸ್ಲೆಂ ತೆಂ ಘೆತ್ಲಾಂ.

ಸಬಾರ್ ವರ್ಸಾಂ ಥಾವ್ನ್ ಕಿತೆಂ ಕೆಲ್ಯಾರೀ ಜಾತಾ ಮ್ಹಣೊನ್ ಬಸ್ಲೆಲ್ಯಾ ಥೊಡ್ಯಾಂಕ್ ಆತಾಂಚ್ಯಾ ಆಡಳ್ಯ್ತಾ ಮಂಡಳೆನ್ ನೀಟ್ ವಾಟೆಕ್ ಹಾಡುಂಕ್ ಪ್ರೇತನ್ ಕೆಲಾಂ, ಆನಿ ತ್ಯಾ ವೆಳಿಂ ಸಬಾರಾಂಕ್ ಅಸಮಾಧಾನ್ ಜಾಲಾಂ ತೆಂ ಸಹಜ್. ಪುಣ್ ಏಕ್ ಸಂಸ್ಥೊ ನೀಟ್ ವಾಟೆಕ್ ಹಾಡುಂಕ್ ಥೊಡಿಂ ನಿಷ್ಠುರ್ ಕ್ರಮಾಂ ಆಡಳ್ತ್ಯಾ ಮಂಡಳೆನ್ ಘೆಜೆಚ್ಚ್ ಪಡ್ತಾತ್. ತಿಂ ಕಾಮಾಂ ಅನಿಲ್ ಫೆರ್ಮಾಯ್ ಆನಿ ಟೀಮಾನ್ ಕೆಲ್ಯಾಂತ್... ಇತ್ಲ್ಯಾ ವರ್ಸಾಂನಿ ಜಾಂವ್ಕ್ ನಾತ್ಲೆಲ್ಯೊ ಜಾಯ್ತ್ಯೊ ವ್ಹಡಾ ಐವಜಾಚ್ಯೊ ಲೋನ್ ರಿಕವರಿ ಅನಿಲ್ ಲೋಬೊಚ್ಯಾ ಮ್ಹಿನತೆನ್ ಜಾಲ್ಯಾತ್ ಮ್ಹಳ್ಳೆಂ ಸತ್ ವಿಸ್ರೊಂಕ್ ನಜೊ...

ಎಂಸಿಸಿ ಬ್ಯಾಂಕಾಂತ್ ಅವ್ಯವಹಾರ್ ಜಾಲಾ ಅಶೆಂ ತಶೆಂ ತೊಂಡಾ ಉತ್ರಾನ್ ಸಾಂಗ್ಯೆತಾ. ಪುಣ್ ತೆಂ ತಿತ್ಲೆಂ ಸುಲಭ್ ನಾ. ರಿಸರ್ವ್ ಬ್ಯಾಂಕ್ ಎಂಸಿಸಿ ಬ್ಯಾಂಕಾ ಸಮೇತ್ ತಾಚ್ಯಾ ಅಧೀನ್ ಯೆಂವ್ಚ್ಯಾ ಬ್ಯಾಂಕಾಂಚ್ಯಾ ಹರ್ಯೆಕಾ ವ್ಯವಹಾರಾಚೆರ್ ದೀಷ್ಟ್ ದವರ್ತಾ. ವೆಳಾ ವೆಳಾರ್ ಆಡಿಟ್ ಜಾತಾ... ದೋಣ್ ಬುಡೊಂಕ್ ಏಕ್ ಲ್ಯಾನ್ ದೊಂಪ್ಳೊ ಪಾವ್ತಾ ಖರೆಂ, ಪುಣ್ ತಶೆಂ ಜಾಲ್ಲೆಂ ತರ್ ಎಂಸಿಸಿ ಬ್ಯಾಂಕ್ ನಿರಂತರ್ ಲಾಭಾರ್ ಚಲ್ತೆಂ ನಾ...

ಅನಿಲ್ ಫೆರ್ಮಾಯ್ ಎಕ್ದಮ್ ಹಠಾಚೊ ಮನಿಸ್. ಖಂಚೆಂಯೀ ಕಾಮ್ ಕರಿಜೆ ಮ್ಹಣೊನ್ ಹಾತ್ ಘಾಲ್ಯಾರ್ ತೆಂ ಕರಿನಾಸ್ತಾನಾ ವೊಗೊ ರಾಂವ್ಚೊ ಮನಿಸ್ ನ್ಹಂಯ್. ಪಾಟ್ ಲಾಗೊನ್ ಕಾಮ್ ಕರ್ಚೊ ಮನಿಸ್. ಪಳೆಂವ್ಕ್ ಅಸೊ ಅಸ್ಕತ್ ದಿಸ್ಚ್ಯಾ ಅನಿಲಾಕ್ ತಿತ್ಲಿ ಸಕತ್ ಖಂಯ್ ಥಾವ್ನ್ ಯೆತಾ ದೇವ್ ಜಾಣಾಂ. 

ಅನಿಲ್ ಆಮ್ಚೆ ಬರಿಚ್ಚ್ ಎಕಾ ಸಾಧ್ಯಾ ಕುಟ್ಮಾಂತ್ಲೊ. ಫೆರ್ಮಾಯ್ಚ್ಯಾ ದೆಮ್ಮಾಲೆಂತ್ಲೊ ಅನಿಲ್ ಐಸಿವೈಎಮ್ ಕೇಂದ್ರಿಕ್ ಸಮಿತಿಚೊ ಅಧ್ಯಕ್ಷ್ ಆಸೊನ್, ಕಥೊಲಿಕ್ ಸಭೆಚೊ ಅಧ್ಯಕ್ಷ್ ಜಾವ್ನ್, ಆತಾಂ ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ಮ್ಹಣಾಸರ್ ಜಾಯ್ಜೆ ಜಾಲ್ಯಾರ್ ತಾಕಾ ತಾಚಿ ಸಂಘಟನಾಚಿ ಶ್ಯಾಥಿಚ್ಚ್ ಕಾರಣ್. ಪುಣ್ ಧರ್ಲೆಲೆಂ ಕಾಮ್ ಪಾಟಿಕ್ ಪಡೊನ್ ಕರ್ಚ್ಯಾ ತಾಚ್ಯಾ ಹಠಾಕ್ ಲಾಗೊನ್ ಮಾತ್ರ್ ಅನಿಲ್ ಲೋಬೊ ಫೆರ್ಮಾಯ್ ಆಜ್ ಹಾಂಗಾ ಮ್ಹಣಾಸರ್ ಪಾವ್ಲಾ.

ಹ್ಯಾ ವರ್ಸಾಂನಿ ಎಂಸಿಸಿ ಬ್ಯಾಂಕಾಂತ್ ಬರೆಂಪಣ್ ಜಾವ್ನ್ ಆಸ್ಚೆಂ ಹಾಂವೆಂ ಖುದ್ದ್ ಪಳೆಲಾಂ. ಗ್ರಾಹಕಾಂ ಲಾಗಿಂ ಬರೊ ಸಂಬಂದ್ ದವರುಂಕ್ ಸಿಬ್ಬಂಧಿ ಆನಿ ಆಡಳ್ತ್ಯಾಚೆ ನಿರಂತರ್ ಮ್ಹಿನತ್ ಘೆವ್ನ್ ಆಸಾತ್. ಜಾಯ್ತ್ಯಾಂಕ್ ಕಳಿತ್ ಆಸ್ಚೆಂ ನಾ. ಲೋನಾಚ್ಯಾ ವಿಷಯಾಂತ್ ಎಂಸಿಸಿ ಬ್ಯಾಂಕ್ ಎಕ್ದಮ್ ಮುಕಾರ್ ಆಸಾ. ಭಾಂಗಾರಾಚೆರ್ ಲೋನ್ ಆಸೊಂ, ವಾಹನಾಂಚೆರ್ ಲೋನ್ ಆಸೊಂ, ಎಂಎಸ್ಎಂಇ, ಪರ್ಸನಲ್ ಲೋನ್ ಇತ್ಯಾದಿ ಖಂಚೆಂಯಿ ಆಸೊಂ ಕ್ರೀಸ್ತಾಂವ್ ಸೊಡ್ಯಾಂ, ಹೆರ್ ಜಾತಿಚೊ ಲೋಕ್ ಸಮೇತ್ ಎಂಸಿಸಿ ಬ್ಯಾಂಕ್ ಪಸಂದ್ ಕರ್ತಾ.

ಕಿತೆಂ ಕರ್ಯಾಂ ಆಮ್ಕಾಂ ಆಮ್ಚೆಂ ಮ್ಹಳ್ಳೆ ಸಸಾರ್, ಆಮ್ಚ್ಯಾ ಸಂಸ್ಥ್ಯಾಂ ವಿಶಿಂ ಆಮ್ಕಾಂಚ್ ಅಭಿಮಾನ್ ಉಣೊ. ದೆಕುನ್ ಆಮ್ಚ್ಯಾ ಸಂಸ್ಥ್ಯಾಂ ವಿಶಿಂ ಆಮಿಂಚ್ ಉತಳ್ ಉಲವ್ಣೆಂ ಉಲಯ್ತಾಂವ್. ತುಮ್ಕಾಂ ಕಳಿತ್ ಆಸೊಂ, ಉಣ್ಯಾ ವಾಡಿರ್ ಲೋನಾಚಿಂ ವಿವಿಧ್ ಸ್ಕೀಮಾಂ ಎಂಸಿಸಿ ಬ್ಯಾಂಕಾಂತ್ ಆಸಾತ್...ತಶೆಂ ಮ್ಹಣೊನ್ ಖಂಚ್ಯಾಯ್ ಬ್ಯಾಂಕಾನ್ ಗ್ರಾಹಕಾಕ್ ಲೋನ್ ಜಾಯ್ ಮ್ಹಣ್ತಾನಾ ಒಟ್ರಾಸಿ ಲೋನ್ ದೀಂವ್ಕ್ ಜಾಯ್ನಾ... ಎಂಸಿಸಿ ಬ್ಯಾಂಕ್ ಅಧಿಕಾರಿ ಹ್ಯಾ ವಿಶಿಂ ಎಕ್ದಮ್ ಕಟ್-ನೀಟ್ ಮ್ಹಳ್ಳೆಂ ಮ್ಹಾಕಾ ಖುದ್ದ್ ಕಳಿತ್ ಆಸಾ...

ಮೊಬೈಲ್ ಬ್ಯಾಂಕಿಂಗ್, ಎಟಿಎಂ ಇತ್ಯಾದಿ ನವಿಂ ನವಿಂ ಸವಾಲಾಂ ಎಂಸಿಸಿ ಬ್ಯಾಂಕಾ ಮುಕಾರ್ ಆಸ್ಲಿಂ. ಶೆಂಭೊರ್ ಆನಿ ಧಾ ವರ್ಸಾಂ ಜಾಲ್ಲ್ಯಾ ಬ್ಯಾಂಕಾಕ್ ಅಸಲ್ಯೊ ಸವ್ಲತ್ಯೊಕರುಂಕ್, ಆಸ್ಲೆಲ್ಯೊ ಸವ್ಲತ್ಯೊ ಅನಿಕೀ ಬರ್ಯೊ ಕರುಂಕ್ ಅನಿಲ್ ಫೆರ್ಮಾಯ್ ಆನಿ ತಾಚ್ಯಾ ಸಾಂಗಾತಿ ನಿರ್ದೇಶಕಾಂನಿ, ಆನಿ ಬ್ಯಾಂಕಾಚ್ಯಾ ಅಧಿಕಾರಿಂ ಸಂಗಿ ಸಿಬ್ಬಂಧೆನ್ ಮ್ಹಿನತ್ ಕಾಡ್ಲ್ಯಾ.

ಒಟ್ರಾಸಿ ಅಪಪ್ರಚಾರ್ ಕರುಂಕ್ ಸುಲಭ್... ಉಲಂವ್ಚ್ಯಾ ಜಿಬೆಕ್ ಹಾಡ್ ನಾಂ. ಉಲಯ್ತೆಲ್ಯಾಂನಿ ಕಿತೆಂಯ್ ಉಲವ್ಯೆತಾ. ಪುಣ್ ತಶೆಂ ಮ್ಹಣೊನ್ ಕಷ್ಟ್ ಕಾಡುನ್ ಕಾಮ್ ಕರ್ತೆಲ್ಯಾಂಕ್ ಧೊಸ್ಲ್ಯಾರ್, ತಾಂಕಾಂ ಜಾಂವ್ಚೆಂ ದೂಕ್, ಅಪಪ್ರಚಾರ್ ಕರ್ತೆಲ್ಯಾಂಕ್ ಗ್ರಾಸಿತೆಲೆಂ ಖಂಡಿತ್.

ಪಾಟ್ಲ್ಯಾ ದೇಡ್ ದೋನ್ ವರ್ಸಾಂನಿ ಕೊರೋನಾವರ್ವಿಂ ಸಕ್ಟಾಂಚಿ ಆರ್ಥಿಕ್ ಪರಿಸ್ಥಿತಿ ಪಾಡ್ ಜಾಲ್ಯಾ. ಕಿತ್ಲಿಶಿಂ ವ್ಹಡ್ ವ್ಹಡ್ ಬ್ಯಾಂಕಾಂ ನಷ್ಟಾರ್ ಆಸಾತ್. ಪೂಣ್ ತ್ಯಾ ಮಧೆಂಯೀ ಎಂಸಿಸಿ ಬ್ಯಾಂಕ್ ನಿರಂತರ್ ಲಾಭಾಚ್ಯಾವಾಟೆನ್ ಚಲೊನ್ ಆಸಾ. ಖುಶಾಲ್ ನ್ಹಂಯ್, ಹ್ಯಾ ವರ್ಸಾ ಪಾಸೊನ್ ಎಂಸಿಸಿ ಬ್ಯಾಂಕಾನ್ 9 ಕೊರೊಡಾಂಚೊ ಲಾಭ್ ಕೆಲಾ.

ಅಸಲ್ಯಾ ಬ್ಯಾಂಕಾಕ್ ಆಮಿ ಆಮ್ಚೊ ಪಾಟಿಂಬೊ ದೀಜೆ, ತೆದಾಳಾ ಮಾತ್ರ್ ಆಮ್ಚೆಂ ಬ್ಯಾಂಕ್ ಅನಿಕೀ ಉಂಚಾಯೆಕ್ ಪಾವೊಂಕ್ ಜಾತಾ... ಹಾಚೆ ಆದಿಂ ದುಸ್ರೆ ಎಂಸಿಸಿ ಬ್ಯಾಂಕಾಚೆ ಅಧ್ಯಕ್ಷ್ ಆಸ್ಲೆ, ಅನಿಲ್ ಲೋಬೊ ಆಜ್ ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ಆಸಾತ್... ಥೊಡ್ಯಾ ವರ್ಸಾಂನಿ ಆನಿ ಕೋಣ್ ಪುಣೀ ದುಸ್ರೊ ಜಾತಾ... ಪುಣ್ ಆಮ್ಚೆಂ ಬ್ಯಾಂಕ್ ಆಮ್ಚೆಂಚ್ ಜಾವ್ನ್ ಆಸ್ತಾ. ದೆಕುನ್ ಆಮ್ಚ್ಯಾ ಸಂಸ್ಥ್ಯಾ ವಿಶಿಂ ನಾಕಾ ಜಾಲ್ಲೆಂ ಉಲಂವ್ಚ್ಯಾಂಕ್ ದೇಢ್ ಶೆರ್ ಮೀಟ್ ಮ್ಹಣ್ಯಾಂ, ಆನಿ ಬರೆಂ ವಾವ್ರ್ ಕರ್ತೆಲ್ಯಾಂಕ್ ತುಮ್ಚೆಂ ಸಾಂಗಾತಾ ಆಮಿ ಆಸಾಂವ್ ಮ್ಹಣೊನ್ ಏಕ್ ಉತರ್ ಸಾಂಗ್ಯಾಂ... ತೆದಾಳಾ ಸಕ್ಕಡ್ ಬರೆಂ ಜಾತಾ... ಆಮ್ಚೆಂ ಬ್ಯಾಂಕ್ ಬರೆಂ ಜಾಂವ್ಚೆಂ, ಯಾ ಪಾಡ್ ಜಾಂವ್ಚೆಂ ಸಕ್ಕಡ್ ಆಮ್ಚ್ಯಾಚ್ ಹಾತಾಂತ್ ಆಸಾ...

-ಜೈಸನ್ ತಾಕೊಡೆ